काठमाडौं। सर्वोत्तम पेन्ट्स इण्डष्ट्रिजले पहिलो चरणमा सोमबारदेखि आइपीओ निष्कासन गर्ने भएको छ। कम्पनीले पहिलो चरणमा वैदेशिक रोजगारीमा रहेका श्रमिकलाई सेयर बिक्री गर्न लागेको हो।
कम्पनीले वैदेशिक रोजगारीमा गएका श्रमिकलाई १० प्रतिशत अर्थात ८५ हजार कित्ता सेयर छुट्याएको छ।
वैदेशिक रोजगारीमा रहेका श्रामिकले १० देखि ५ हजार कित्ता सेयरका लागि आवेदन दिन सक्नेछन्। कम्पनीको आइपीओ निष्कासन अवधि वैशाख २४ गतेसम्म खुला रहने बिक्री प्रबन्धकले जनाएको छ।
त्यसपछि कम्पनीले ७ करोड ५ लाख ५० हजार रुपैयाँ बराबरको ७ लाख ५ हजार ५०० कित्ता सेयर सर्वसाधारणलाई विक्री गर्नेछ।
सर्वोत्तम पेन्ट्स इण्डष्ट्रिजले नेपाल धितोपत्र बोर्डबाट जारी पुँजी ३४ करोड रुपैयाँको २५ प्रतिशतले हुन आउने ८ करोड ५० लाख रुपैयाँ बराबरको ८ लाख ५० हजार कित्ता सेयर बिक्रीको अनुमति पाएको छ। कम्पनीको आइपीओ निष्कासन तथा बिक्री प्रबन्धकमा ग्लोबल आइएमई क्यापिटल छ।
यो वर्ष पुस मसान्तसम्म कम्पनीको प्रति सेयर आम्दानी ६.२४ रुपैयाँ, प्रति सेयर नेटवर्थ ११६.४१ रुपैयाँ र सञ्चित नाफा ४ करोड १८ लाख रुपैयाँ रहेको विवरण पत्रमा उल्लेख छ।
कम्पनीले आइपीओ निष्कासनका लागि गराएको रेटिङमा केयर रेटिङस नेपालले केयर एनपी डबलबी माइनस रेटिङ दिएको छ। जसले वित्तीय दायित्व बहन क्षमतामा मध्यम जोखिम रहेको जनाउँछ।
कम्पनीको रजिष्टर्ड कार्यालय कैलालीको गोदावरीमा छ। सर्वोत्तम पेन्ट्स इण्डष्ट्रिजले घर, पर्खाल, झ्याल ढोका, धातु, काठ, प्लाष्टिक तथा अन्य वस्तुहरुमा प्रयोग गरिने रंग तथा प्राइमरहरु उत्पादन तथा बिक्री वितरण गर्छ।